पंचांग ही विस्तृत संकल्पना आहे . भारतीय सौर कालगणनेचा वापर व्यव्हारातही करण्याची गरज आहे. राष्ट्रीय कालगणनेची महिती  जनतेपर्यंत पोहचवण्यासाठी पंचांगाचे सॉफ्टवेअर तयार केल्याचे पुणे येथील वास्तुविशारद संजय महाशब्दे यांनी प. सा. नाटयगृह येथे आयोजित व्याख्यानात सांगितले. 

संस्कृतीवैभव आणि कुसुमाग्रज वाचनालय यांच्या वतीने आयोजित स्व. रामनाथशेठ चांडक स्मृती व्याख्यानमालेत ‘वैदिक संस्कार ते पंचांगाचे सॉफ्टवेअर’ या विषयावरील व्याख्यानात महाशब्दे यांनी सांगीतले, ऋषीमुनींनी कालगणनेविषयी मांडलेल्या सिद्धांताकडे आपले दुर्लक्ष झाले आहे. जगभर ग्रेगोरियन कॅलेंडर पद्धत वापरली जाते. विज्ञानाचा आधार घेत पोप ग्रेगोरियनने कालगणना तयार केली. या कालगणनेच्या पद्धतीत अनेक त्रुटी आहेत. १९५७ मध्ये भारत सरकारने शकसंव्त्सरला कायद्याने मान्यता दिली आहे. मेघनाथ सहा यांनी कालगणनेच्या पद्धतीत सुधारणेचे मोठे कार्य केले आहे. राष्ट्रपतीही भारतीय सौर कालगणनेचा वापर करतात. सुक्ष्म कालगणना करणारी व्यवस्था भारतीयांकडे आहे. दुर्दैवाने भारतातच पंचांगाची हेटाळणी केली जाते. केवळ धार्मिक कामासाठीच आपण पंचांग वापरतो. पंचांगाचा वापर केवळ शेतीसाठीच नसून आयुर्वेद, वास्तुशास्त्रातही त्याचा अभ्यास उपयुक्त ठरत असल्याचे महाशब्दे यांनी सांगीतले. प्रास्ताविक संस्थेचे अध्यक्ष नंदन दिक्षित यांनी, तर सुत्रसंचालन अमिता आपटे हिने केले. जगदिश कुलकर्णी यांनी वक्त्यांचा परिचय करून दिला. व्यासपीठावर निवासी उपजिल्हाधिकारी रमेश काळे, राधाकिसन चांडक, अरविंद पाठक, पी. एस. कुलकर्णी उपस्थित होते .